எது வேண்டும் சொல்

எது வேண்டும் சொல் நேசனே உனக் கெது வேண்டும் என் நேசனே?

மதிவாட மனம்வாட மயக்கங்கண் ணிறைந்தாட மதுபான முண வேண்டுமோ அன்றித் துதிபாடும் உலகோருள் புகழ்பாடி மகிழ்ந்தாடச் சுத்த ஜலம் வேண்டுமோ - எது

வாதாடி நகையாடி வழிகளில் விழுந்தாடி மதுவுண்டு கெட வேண்டுமோ அன்றித் தாதாவே கனவானே தனவானே யெனச் சாற்றத் தண்ணீ ருண்ண வேண்டுமோ - எது

பகைதந்து பழிதந்து பரியாசந் தரு மது பான முண வேண்டுமோ அன்றித் தகை கொண்ட கதியேற அருளொடு புகழ்பெறத் தண்ணீ ருண்ண வேண்டுமோ - எது

சண்டை காயம் கந்தை அமளி வேதனையாதி தருங்குடி வெறி வேண்டுமோ - அன்றிப் பண்டை வேதஞ் சொன்னபடி மோட்சம் பெற ஜல பானமது வேண்டுமோ - எது

இரத்தக்கண் பெருந்துக்கம் ஏக்கம் நடுக்கம் வெட்கம் இவைதருங் குடி வேண்டுமோ - அன்றித் திரத்துக்கும் அறிவுக்குஞ் சுகத்துக்கு மிடமான தெளிந்த தண்ணீர் வேண்டுமோ - எது